金融市場的異常指標

話說本熊的兄弟三兄終於肯出文，令本熊又想趁熱鬧寫吓嘢。

本熊三月二十日出文講跌市，距今已經接近三個月 跌市的三種分類，美國道指標普已然回到年頭高位，納指更加創了歷史新高，及至昨天六月十一日一日跌番六個巴仙，是今年反彈以來的最大跌幅。新間報導立即指出股市大為恐慌，加上啲已經一直存在但升市時提都唔提的基本分析，就斷定股災重臨。

咁究竟股市玩完未呢？雖然本熊沒有水晶球，但其實都有好多指標可以參考一下的。

首先講講股市知識101:

市場成交=買方vs賣方
市場成交價下跌=買方人少vs賣方人多
市場成交崩盤式下跌=買方絶跡vs賣方不問價拋售

要造成第三種現象，通常反映了賣方玩家超級缺水，所以不得不賤賣資產套現，常見於槓杆過大玩爆倉，因為拆倉潮出現的崩盤式下跌，現成例子係今年三月的多次溶斷。一般人一個戶口一睇就知夠唔夠水啦，咁點様可以睇到市場缺唔缺水呢？一般就睇借唔借到錢或要幾大成本 (利率) 先借到錢，在云云指標中最常用之一係LIBOR-OIS 的利差。

1. LIBOR-OIS 利差顯著擴大：

LIBOR (London Interbank Offered Rate) 是海外美元短期貸款利率，利率上升即是借錢困難 (要付出更多成本) LIBOR 急速上漲即表示海外美元非常告急。

OIS (Overnight Indexed Swap) 是基於隔夜拆借利率嘅掉期，隔夜折借利率即各國央行制定的基準利率，如美聯儲的聯邦基準有效利率。OIS 的本質是一種利率保險合約，買保險的擔心利率會上升，需要鎖定利息支出，為此寧願支付一定的保險費。

LIBOR-OIS 之間的利差，反映了交易對手的信用風險 (借唔借到錢)，也隱含了市場的流動性風險 (水唔水緊)。

正常情況下，利差一般在0.2～0.4%左右，今年三月曾經爆上過1.4%以上 (歷史高點係2008年8月嘅4.5%)，目前六月四日嘅利差係0.17%。

https://www.macrotrends.net/1447/ted-spread-historical-chart


2. VIX 指數上漲：

VIX (Volatility Index) 市場波動率指數，一般layman 叫恐慌指數，解説係VIX 上升 (至30以上) 市場就好恐慌；若VIX 低企 (如20以下) 市場就好安穏。

咁其實VIX 點黎嘅呢？VIX 係從美國股市S&P500 標普嘅期權成交價格演化出黎既。條食物鏈係先有S&P 標普、跟著股指期貨、然後股指期權、最終變成VIX。VIX 其實計算緊股指嘅年化波動率，以反映未來30天股市波動嘅可能性。

知道VIX 係咩嚟，第一個見解係，VIX 係市場參與者真金白銀落注投番黎。買股指期權本質係買保險以對冲風險，當風平浪靜時個個都覺得無乜風險，所以保險金 (期權金) 自然低企；若見到有黑雲飄近，覺得黎緊風大浪大，保險金 (期權金) 便會水漲船高，換算成VIX 指數飆升嘅結果。

但盡信書不如無書，VIX 只是市場參與者對未來的預期，並不一定最終會演變成真實，所以VIX 並沒有必然的預測能力。

反過來說，低VIX 給人一個市場安穏嘅幻象，由於超低利率導致資産收益率大飢荒，市場不斷推高資產價格，相應的保險金不斷下降，波動率因而下降；越低的波動率加強了市場信心，繼而進一步推動價格上升。這是一個正反饋循環，會一直運行到泡沫爆破，一切推倒重來才完結，

(提外話，阿爺也曾經推出過中國版的VIX 指數，但因為太怕人為操縱，所以在18年頭的股市大跌後剎停至今，這側面反映了中國金融市場的不成熟，但也是急唔黎的)

隨著美國大牛市，近年VIX 一直處於20 以下，只是被今年三月的大溶斷衝上80 以上水平。隨後的反彈市將VIX 壓至30 以下，只是昨日跌1800點的市況，VIX 從前收的28 衝到收市的41 水平。

https://m.hk.investing.com/indices/volatility-s-p-500


金融市場的異常指標，就像市場的紅綠燈，當燈號長綠時，大家可能可以一往無前；但當燈號轉紅時，大家可能需要停一停、等一等了。

除了上述兩盞燈，市場當然還有很多燈號可供參考，其中涉及金融市場的貨幣市場、債券市埸、回購機制，外滙市場方方面面知識，有機會再參詳參詳了。