探索之旅（台中篇2）

鑒於近半年逢假日必亂嘅習慣，長假期都係出走穩陣啲，於是便再黎過台中之旅，距離首篇探索之旅（台中篇）就是足足一年時間囉。

今次出走嘅心情不免有點複雜，首先是香港嘅亂局還未止息，在可見的一年多還未完結 (起碼過咗一月台灣總統大選、九月立法會選舉、十一月美國總統大選才有望轉勢) 這還是最樂觀的假設，也許阿爺對香港黎個放任政策，經濟衰多三五十年也是有可能的。是以移民出走嘅迫切度/ 期望值，若一年前只有30% 的話，一年後的今天已經有7-80% 的説。

其次是最近先同身在台中嘅風兄筆戰，因為政見不同而傷感情係好可惜嘅。本熊唔想用「反面」這個形容詞，但是若説要修復交情的話，確實係要等待政治事件完滿結束後才有可能。回想一年前風兄會留言提點本熊一二，可是今次應該沒有了，一想到這裡本熊便不能釋然。

無論心情如何，只要一個半小時航程，便可以由香港飛抵台中了。

回説選擇台中嘅落腳點，由於實在太太太喜歡草悟道嘅氛圍，故還是下禢於其中的文創旅館。行程方面係延續上次台中探索之旅，上回行過西區、西屯、南屯之後，今次選擇 (風兄推介的) 北區、北屯走走看。

4) 北區：首日上午吃過早餐後，便由草悟道經公益路東行，穿過台灣大道沿著梅川東/ 西路北上；至育德路轉入學士路，穿過太原路、漢口路至北平路為止。

上述路段整體感覺就似九龍塘/ 石硤尾一帶，有一整段係純住宅用途，要走十數分鐘路程才會有商圈/ 飲食購物等生活機能。好的來説便是十分清靜，尤其是育德路/ 太原路等林蔭大道連綿的路段，可謂鳥語花香。加上若如台灣出行必用機車的習慣，行駛數分鐘便可解決基本所需的話，以上路段還是足夠方便的。

例子有育德路的「龍寳怡臻邸」建坪92主建坪41，實尺千四，標售價2980萬台幣，坪價32萬即港幣二千七 (以目前匯率1:3.6計算，比一年前升左接近10%)，總價八百三十萬港幣。由於地段好加上樓齡新 (8年)，始終有點貴，尤其是實用率較低。另外找不到租盤所以不知道租金回報率是多少，而一般樓齡大概三十年上下嘅會比新樓打五/ 六折左右，即坪價20萬都有不少選擇。

其實住喺啲區未必會揀apartment，本區有不少別墅羣 (等於香港加洲花園般嘅排屋)，如「太原綠園道別墅」建坪81主建坪也是81 (即100%實用率) 連雙車位，實尺二千七。標售價2380萬台幣，坪價29萬即港幣二千四，總價六百六十萬港幣。佢樓齡唔太舊只有18年，同區30年別墅都要1900萬左右，相比之下啲個盤實在幾抵，但也許佢有其他defect 本熊一時未能參透也説不定呢。

壞處方面呢，由於沒有甚麼標綕性建築/ 大型商場，此區商圈所提供的多為民生服務/ 基本需要為主，若要求較高檔次的便要走到西區/ 西屯了。

回程時沿崇德路落台中車站方向 (也是用走的) 目標係一中夜市，一中夜市相對於最出名的蓬甲夜市實在好太多了。首先係比較乾浄 (可能因為本熊在黃昏而不是深夜到訪) ；其次係比較集中，沒有篷甲咁多分支；最重要係比較年輕，一中感覺十分像韓國首爾嘅師大，也許因為一半以上都係賣韓裝呱。

5) 北屯：另一天出發去北屯，google search 話北屯有三個商圈分別係松竹、昌平同崇德，崇德即早一天沿崇德路一帶 (後來才知道崇德路超長) ，而昌平在中間位置，本熊便選擇了有鐵路站的松竹開始。

一離開松竹站就出事，由於跟隨google map 找素食店去，原來本熊直接skip 左松竹商圈，行左去另一面深入民居 (其實係向著昌平商圈去)，環境就似七/ 八十年代新界區咁有啲荒蕪嘅感覺。找到素食店 (抵食又美味) 用餐後，原來行多一條街便到達昌平路。昌平路呢？並不是一般的舊，而是真的好很舊，有點三/ 四十年代日本城下町的感覺。一條街有齊乾貨、濕貨，餐飲購物甚麼也有點，但當然係庶民版本果隻啦。而前舖後面一排排的便是民居，啲邊排屋已經有四/ 五十年歷史了。

本熊走過一段昌平路後便轉入崇德二路，因為目之所至果邊才有較新蔟樓房。又跟隨google map 在熱河路尾一間cafe 坐下，盤算為何説北屯多新樓但眼見個商圈區咁舊嘅，找找下才發現最關鍵嘅關鍵詞「十一期重劃區」北屯新區係指：

「所謂的台中市十一期重劃區範圍，其範圍北臨豐樂路、豐樂北二路作為計畫界線，南臨則以大連路二段為界，而其東臨之界線則係昌平東六路、崇德路二段為止，西臨之界線則係崇德十路接梅川東路五段，其規劃總面積約141.0193公頃，提供建築用地面積：約78.2623公頃」

原來本熊所在的cafe (松竹路以南) 只是在重劃區邊界，還未到達正式的十一期所在，要認識真正嘅北屯還要向上繼續行，之前提及的崇德路係作為主幹一直伸延至好遠好遠嘅，本熊於是打個咭便繼續行程。

打咭即開app search 下cafe 所在的建築「大毅家風景」有放盤建坪88主建坪46連一車位，實尺千五。標售價2080萬台幣，坪價24萬即港幣二千，總價五百八十萬港幣。以坪價廿萬頭6年新樓計，開始近似風兄所言比市區平一半嘅新樓。

本熊繼續沿崇德路北行，踏入十一期才發覺別有洞天，十一期係好似七期咁全區推倒重來，所以綠化空間十分充足。感覺更似日本郊區咁生活機能沿幹道而建，全部獨位建築外連停車埸，好讓顧客駕車前往。最佳例子如一整棟規模十分大嘅Starbucks，更有行車入口方便驅車take away。

本熊又打咭找到崇德路三段1年樓「時代英倫」，建坪74主建坪32連一車位，實尺千一。標售價2680萬台幣，坪價36萬即港幣三千，總價七百四十萬港幣。其月租叫價45K台幣，回報率2.0％，看來新樓溢價真的不小。

6）西區：行左幾日始終感覺西區最合本熊熊娘嘅生活習慣，由於相當嗜酒嘅關係 (識得本熊本人便知，但還未至於酗酒的) 所以比較抗拒駕駛，居住地區最好步程十分鐘內便有齊各式餐飲供應，另外西區有嘅優點實在太多：

1. 審計新村嘅咖啡同西式輕食，更有充滿活力嘅文創市集
2. 中興一巷嘅臺虎精釀手工，獨樂樂與眾樂樂皆宜
3. 步程十分鐘內有超過十間拉麵店，拉麵係本熊獨食嘅首選
4. 草悟道嘅街頭表演，餐後散步聽音樂，微熏下更陶醉

由於時間關係已經選定目標了，便是審計新村旁嘅「慶仁之間」建坪84主建坪39連一車位，實尺千三。標售價3258萬台幣，坪價39萬即港幣三千三，總價九百萬港幣，熊娘更幫佢命名為「台中阿士甸」。以本熊目前能力當然無spare money 買九百萬嘅台中樓啦，但這個作為研究項目和奮鬥目標便是黎緊三幾年嘅工作了。

最後要提提台中空氣質素差左好多呀，台灣有個AQI 指數，中部係唯一處於「對所有族羣不健康」水平嘅地區，連日來天空也是灰濛濛一片的，就是間中有藍色也不是清藍，而是加上一層牛油紙似的，希望有關問題可以改善啦。