三月股票期權倉 (月結) 最漫長的一個月

將2020年三月說成有生以來最漫長嘅一個月，只要是身在股海的，本熊估唔會有多少看倌非異。尤其係如本熊般做齊港股美股，每日簡直係被早晚輪流轟炸 (若有如group 友玩埋歐洲的，可說是整日全方位捱轟) 果種煎熬真的不足以為外人道。

説是最漫長的也是有數據支持的，以美杜來說月頭兩幻五四、跌至月中一幻八一 (波幅29%) 及後反彈至執筆時的兩幻一四 (波幅18%) 這是足足近50%嘅幅度，一般要行多少年才完成？以絕對點數計，目前更打回三年前即17年Trump 帝就職時的水平，可説成一個月便經歷了三年時間似的，真係人都癲呀。

咁本熊又點捱過呢？首先要說今個月沒有期權倉明細和結算了，不是因為輸到post 唔出手，最主要原因係期權已經融合與實貨一起操作，不大可能獨立計算成敗了；就是計了也不能反映本熊嘅實際成績/ 慘況了。

本熊是這樣執行的：
1. 起初為了維持constant 嘅leverage ratio，三月一開始以來，基本上每日都要走貨減持。
2. 美股上月已出清NTNX 和BYND，只有用BABA、AAPL 等打遊擊戰，本來set 了月低位 (當時的) 做sp，被撃穿了便向後撤，雖然整體都係輸，但輸嘅數目相對有限。
3. 重倉嘅港股被擊穿兩幻五便決定放棄維持槓桿比率，改為大手清貨，由兩幻五每次賣一至兩成持倉，賣到兩幻二重賣緊。
4. 由於IV 高據不下，有實貨和short put 在手，會選擇賣走實貨先。
5. 上面會做short call 補多少，但又怕反彈被夾，所以做到好遠下，故只有心靈上嘅安慰。
6. Short put 去到太ITM 會選擇認賠平倉，改sp 較近價的，因為就算唔回升都有較多的時間值食下。
7. 美杜跌三千果日有衝去買少少貨 (是抄摩兄功課的DHCNL 和NRZ)，一隻第二日反彈三成時走了 (原來等多幾日變咗兩三倍) 另一隻大市大反彈佢都唔升，怕反輸便平手左右走了 (原來市跌果日佢先黎勁升)
8. 學group 友買J-Reits (3287、3292)，有兩三成賺又走咗。
9. 又學group 友買S-Reits，以為RW0U 穿多年底0.9x 好吸引，跟著目前輸緊兩成。
10. 陳年嘅倉底貨都賣得八八九九了，槓桿水平由1.8x 減到目前0.5x 左右。
11. 今月唯一實貨唔洗跌果隻係Soho China，但由於要縮倉也要按比例忍痛減持，相對目前價位還要賣得好差下。

12. 目前為止YTD -20%，不要問按year high 計如何，本熊不想記起。

至於後市如何，本熊認為以殺流動性嘅熊一已經結束，但以殺估值嘅熊三遠還未開始，目前係因為救市而來嘅熊二反彈中 (整體參照08年走勢) 希望可以反彈/ 反覆兩三個月，故會以炒波幅為主玩住先。