本熊在樓市(六)轉身射個三分波,新樓一的誕生。

出得本熊在樓市系列即係本熊又有新搞作了,首先講結果,隨著Trump 帝五月推翻貿談的神助攻,本熊終於六月頭在估到價的情況下入手目標屋苑兩房小單位了。

跟住講歷史,根據本熊在樓市(三)本熊連同熊娘熊母三個 (連四隻貓) 租住同區新盤不經不覺已然三年多 (要做雙租嘅唯一原因係 - 買得起嘅地方唔想住、想住嘅地方買唔起) 雖然以市值yield 計係好抵租,但係被業主一年加一次租咁lump sum 計都開始有啲赤;加上婆媳間未至於反枱,但爭吵少不免,時間長左都係合久必分為妙,是以啲次買樓係有剛需嘅成份。

然後講操作,話說本熊在樓市(五)捨得18年中賣出樓一得到首期,接著做remortgage 將聯名單位全部轉番做個人名下,以free 番熊娘個首置名額,最後入息證明齊全,搞下搞下已經19年三月,本熊於是出發找經紀搵盤去。

其時三月初農歷新年過後,阿爺降準放水啟動,股市樓市一改年前的頹廢,開始谷底回升中。本熊最初經熊姐找到港記經紀哥哥,佢一開始推介左個極高層貼市靚盟 (但無樓睇) 本熊心想過千幻無樓睇要決定有點輕率,於是反左個less 8%保守價看看情況,誰不知個盤轉頭比人承左,更開啟兩個月一直無樓睇、市價盤一路走、叫價不斷被推升的歲月。

本熊由一開始找兩個經紀,至最後中記、利記、美記、地膽全部找上的局面;由不時有經紀what’s app 報盤,至最後全部無盤可報的景況。其時仍然流通嘅盤要不是性價比超低 (豬扒當貂蟬) 便是皇帝女唔憂嫁 (按估價mark up 10-15%) ,就是比唔到價請非誠勿擾。直至接受九成半放盤無樓睇,業主全部連租約叫賣,若肯追價先轉番交吉,或要直接連租約承接的現實。原來本熊以為最humble 的願望 - 唔洗食豬扒、以估到價買入中等質素盤,在大陽春的時候會變成那麼的遙不可及。在眼前一件件豬扒被接走,不斷被經紀揶揄的兩個月後,本熊一度放棄搵盤的念頭,直至Trump 帝五月初的一個Tweet 將情況改變。

時為五月五日深夜,Trump 帝發文指中方在貿談有野講過唔算數,於是要叫停磋商並立即向二千億貨品開徴重稅。港股翌日以跌千點回應,五月全月計跌左十個巴仙,本熊更深陷港美期權的泥沼中 (詳見五月股票期權倉(月結)(被)極限施壓) 可CCL 有大概三星期time lead,故樓市整個五月期間仍是報升勢頭中。其實現市況立即被冰封了,由早前一個月十幾個成交,至五月整月得番一個交易,就是豬扒再無客追,但業主也沒有劈價求售的說。

直到六月初,唯一仍有不斷update 本熊的港記哥哥,說cool call 到一個貼市中層盤,要本熊在upload 上system 的限時前務必去睇睇,以免個盤open up to all 有節外生枝的可能。本熊於是即晚連同熊娘睇樓,翌日早上回覆減3% 即比票,黃昏時份經紀回電業主確認收票,至七月初的現在完成銀行按揭,本熊終於可以放下心頭大石,更可以向一直揶揄本熊買唔到樓的利記姐姐還以一點點顔色。

話說回來,其實港記哥哥第一個推介的原來係最筍嘅,可是本熊當時沒有把握得到。

最後係後記,本熊上一篇樓市文章才説要反思港樓長遠的投資價值,現在轉身便射個三分波是否有點自打嘴巴?其實本熊認為港樓將來的升值潛力確實減弱了,但還是有以下的考量:

1. 波叔透露若樓價再升會考慮加辣限制轉名,那本熊早前的一切安排便GG了。
2. 是次入貨是剛需來的。
3. 相對保持樓一的0.2倍槓桿,現在入貨可以操作一倍的槓桿還是比較強。
4. 加息週期走到尾聲,各國央行處理危機的方法只有放水一途。
5. 最後係本熊的職涯規劃,話說本熊正打算放棄主動收入,是以是次操作能夠提升銀行總結欠至八位數字,是個人財務規劃的極限 (自認為的成就)之一,在可見的將來應該再沒有發揮空間了。

因應新入手的屋苑和已賣出的樓一只有一字之差,故本熊正式宣布是次新樓一的誕生。


留言

  1. 一口氣看完 <> 1-6, 很精彩的置過程。同時亦恭喜本熊兄再度入市。

    回覆刪除
    回覆
    1. 多謝斗滿兄支持,會看完1-6 的本熊歷史著實感動。

      刪除
  2. 又要搵日同本熊兄慶祝一番!
    三弟七月尾將會展開換樓三步曲第一步,開始放第一間收租樓。只怕美帝隻老牛頂唔順。。。

    回覆刪除
    回覆
    1. 等緊三兄個私片呀。
      美帝隻牛有Trump 帝頂著,現在執行還有時間,三兄加油💪

      刪除
  3. 恭喜恭喜~~
    恭喜買入新物業,更恭喜負債破千!

    回覆刪除
    回覆
    1. 多謝R兄支持,本熊個層層疊玩到尾聲了。

      刪除
  4. 恭喜!
    又可以洗下錢裝修下安樂蝸!

    回覆刪除
    回覆
    1. 多謝快兄支持,新樓一其實係比熊母住的,要佢搬近熊姐屋苑方便照應,故找這個有多少裝修 (廚廁完好) 只需執漏少少便完事的。

      而本熊與熊娘會繼續做雙租 (只是租細&平一點) 在不太久的將來有機會走佬過XX 了。

      刪除

發佈留言

熱門文章